Blog: Riku's Write
Die struikelblok in die pad van wêreldvrede
Ek hoor die wêreld brand al weer
Ek sien die aarde disintegreer
Die noorde het die reën gesteel
Hul dade het hierdie land verniel
Ek stap met my masjiengeweer
Om te oordeel wat jy vra
Ek treur oor my Amerika
Die son sak neer oor haar
My asem word met sand gesif
My longe nat en swaar
Die gif het al my bloed bereik
Ek tel my laaste dae
Vir vrede
Vir almal
uit: My Amerika
album: Aan’t sterre tel luister/download/stream
Ek het die voorreg gehad om Amerika ‘n paar maal in my lewe te besoek en ek was dadelik verlief op die land. Dit was soos ‘n vreemde droom wat waar geword het toe ek in Los Angeles aanland. Ek het soveel plekke en landmerke herken wat ek voorheen slegs in films en TV gesien het. Wat ‘n wonderlike ervaring was dit om die droomland in lewende lywe te betree!
Amerika is ‘n merkwaardige land. Dit wat Amerikaners bereik is asemrowend, letterlik en figuurlik. Van al die dinge wat Amerika so ongelooflik voortreflik mee is, dink ek haar beste uitvoerproduk, is haar gepoetste beeld. Bloot net die feit dat wanneer ek van “Amerika” praat en almal weet ek praat uitsluitlik van die Verenigde State en geensins van albei die kontinente nie, spreek alreeds boekdele oor hoe suksesvol die VSA se beeld wêreldwyd bemark is.
Met my reis het ek ander dimensies Amerika begin raaksien. Ek het besef dat die land heelwat meer kompleks as my reeds gevormde beeld van haar is. Skokkend vir my was die hoeveelheid haweloses wat in kartondose op sypaadjies slaap. Vuisvose oorlogsveterane wat hardop met hulself gesprekke voer soos hul in die strate afloop. Grumpy old men om elke hoek en diner, wat gal te braak het oor hoe alles aan die verval is sedert só en só aan bewind is. Ek kon helaas sien dat die krake heelwat ouer as die vorige verkiesing is.
Ek het in ‘n ou derdehandse VW golfie geklim en die pad gevat op soek na mooi goed. Wat ek gevind het, het my met ‘n dieper onverwoordbare liefde vir Amerika gelaat. Ek het op die interessantste plekke barmhartigheid en warmte ervaar en op ander plekke die treurige afwesigheid daarvan. Die liefde het altyd gekom van individue terwyl die liefdeloosheid gewoonlik die hand van korporatiewe mag verklap.
Ek het ‘n heel interessante nag in ‘n backpackers in Johannesburg Kalifornië (populasie 114) deurgebring. Die backpackers het gewerk op ‘n “honor system” waar jy bly solank soos jy wil, vat van die blikkieskos en droë rantsoene soveel soos jy wil en los die geld in ‘n blikkie in die kombuis.
Daar het ek en ‘n Vietnamoorlogveteraan, Jim Thom, alleen in die konstant krakende spookagtige huis gebly. Ek sê “alleen”, maar hy het wel so bietjie van ‘n arsenaal saam met hom gehad, onder andere een groot masjiengeweer wat hy sê hy van die weermag gekry het toe hy ontslaan is.
Die volgende dag het ek hom vergesel in sy soektog na ou stukke metaal en myn toerusting in ‘n paar van die verlate mynskagte op Bureau of Land Management (BLM) https://www.blm.gov/ grond. Hy versamel ou gereedskap wat hy dan in kunswerke omskep. So donner die drie van ons: ek, Jim en sy masjiengeweer (met ‘n flits vooraan vasgeductape,) daar af in ‘n skag wat deur die jare meer as een ineenstorting meegemaak het.
Ek vra: “Why the gun?” Hy antwoord:” Ya never know what ya are gonna find down there. Sometimes snakes, but mostly never-die miners still holding out for gold.”
Op ‘n stadium raak die klim in die mynskag af so rof dat jy altwee jou hande moet inspan in die klim. Hy vra my om sy geweer vas te hou om vir hom ‘n lig te gooi. Daar staan ek toe met ‘n M16 in my hande, gerig op ‘n oud-Amerikaanse soldaat in ‘n stralekrans, sodat die man sy weg in die donker kan vind. ‘n Gebeurtenis so buitensporig onverwags dat ek die beeld vandag nog helder in my kop ervaar.
As kind en naïewe oningeligde jong mens, het ek telke male geval vir die films en fiksie waarin Amerika die vrede vir die hele wêreld bewaar deur die Nazis/Kommuniste/Terroriste uit die Ooste/Aliens/selfs moordadige asteroïedes wat net te graag alle lewe op aarde wil uitwis, te oorwin. Die narratief waarmee elkeen van ons al tot in ‘n ideologiese beswyming in gebombaardeer is, is dat Amerika hier is om ons almal te red en vrede op aarde te bewaar. Amerika is die “good guys”.
Daardie illusie het egter soos kapok voor die son verdwyn namate mens met naakte geskiedenis gekonfronteer word. Soos wanneer mens uitvind dat miljoene inheems Amerikaners eers vermoor moes word voordat die Europeers die “onbewoonde” land wat hulle “ontdek” het kon inpalm. Ondersoek gerus die “trail of tears” en mens word gou bewus van die Amerikaanse modus operandi van die tyd: die “ethnic cleansing” of te wel die verwydering van “ongewensde” mense van ‘n land wat jy vir jouself wil hê en dan ontwikkel met die hulp van slawe-arbeid. Dus, die volksmoord en bloedbad met die intrapslag. Dan, die groteske slawerny wat Amerika welvarend gemaak. Ongekende pyn en lyding vir miljoene en miljoene kinders, vroue en mans. Slawejag en dan onmenslik gemartel en vasgeketting in die bote op pad na “the land of the free”. Familiebande tussen swart mense tot in ewigheid uitgewis met kinders en ouers wat die besittings van eienaars van heinde en verre onder dwang geword het.
Nou kan mens argumenteer dat almal weet dat die VSA ‘n duistere geboorte gehad het, maar dat hulle daardie volksmoord, slawerny en minagting van “andere volke” lankal al ontgroei het. Die geskiedenis is geskiedenis. Vandag is die American Dream: “Anyone can make it.” Rassisme is verby, hulle het selfs al ‘n swart president gehad. Wel, “American dream on”: ten spyte die Republikeinse kandidaat vir die presidentskap, Nikki Haley se sotlike stelling nou die dag, “ we’ve never been a racist country,” en andere wat net soos sy dink, is rassisme in Amerika is net soveel iets van die verlede as wat dit in Suid-Afrika is.
Amerika het wel gehelp om die Nazis te oorwin, NAVO gehelp stig om sekuriteit in die Noorde te bewerkstellig, asook ‘n yslike rol gespeel om die VN te help maak wat dit vandag is. Three strikes, America is great!
Amerika is die fakkeldraer van twee belangrike universele waardes, naamlik: Vryheid en selfbeskikking. Of ten minste, so sê die pro-Amerika PR.
Kom ons loer na so paar voorbeelde waar hul aksies hul woorde weerspreek.
1899-1902: Filipynse-Amerikaanse oorlog: Amerika veg teen Fillipynse onafhanklikheid. Buiten die 20 duisend soldate in die skermutseling is minstens 200 duisend burgerlikes wreed om die lewe gebring. (Sommige beweer die getal nader is aan ‘n miljoen.) In hierdie oorlog pas die Amerikaners ‘n verskroeide aarde beleid toe op die gebied. Mense word in konsentrasiekampe gegooi, waar duisende in haglike omstandighede sterf. Stel jouself voor jy is aan die ontvangkant van daardie tipe behandeling. O wag so ‘n bietjie….
Vandag nog is Amerika die enigste land wat atoombomme op burgerlikes laat ontplof het. In Hiroshima en Nagasaki was burgerlikes willens en wetens geteiken, níé militêre basisse nie.
Die hoeveelheid ontwrigting en staatsgrepe wat die Amerika d.m.v. die CIA uitgevoer het in Sentraal- en Suid-Amerika is verbysterend. In Gautemala het die Amerikaanse United Fruit Company die bevolking so te sê as slawe ingespan om die piesangprys in Amerika laag te hou. In 1954 het Amerikaanse bomwerpers daar verwoesting gesaai. In Nicaragua, Chile, Brasilië, Honduras, Haïti, Hawaii, Uruguay, Panama, Argentinië en El Salvador, het Amerika ‘n rol gespeel wat regerings laat kantel het. Nóg bloedvergieting. Elkeen ‘n voorbeeld waar die idee van “selfbeskikking en vryheid” vir ander, deur Amerika verontagsaam word.
In liberale Iran was dit Amerika en Brittanje wat van die demokraties verkose Mohammad Mosaddegh ontslae geraak het om met diktator shah Mohammad Reza Pahlavi te vervang. Laasgenoemde se vergrype, selfverryking en korrupsie terwyl burgers van Iran uitgehonger en arm was, was so skreiend, dat die Iranese opgeruk het met massiewe optogte en betoë. Die uiteinde was bestyging van die “troon” deur die Ayatollah Khomeini. Vandag weet ons almal van die gevolge van die onderdrukkende effekte van die sharia wetgewing wat Khomeini in Iran tot stand gebring het. Hoeveel meer selfbeskikking en vryheid sou Iranese vandag gehad het as dit nie was vir die Amerikaanse befoetering daarvan nie?
So ook is Isis, die Taliban, aaklige terroristiese groepe wat hul totstandkoming grootliks aan onnodige en ongevraagde Amerikaanse inmenging te danke het. Die Taliban was oorspronklik deur Amerika befonds om teen die Russe in Afghanistan te veg. Isis het ontstaan uit die magsvakuum wat gevorm het danksy die ongeregverdigde oorlog wat Amerika met Irak gevoer het. Daar was kwansuis “weapons of mass destruction WMD”. Vandag weet ons dit was ‘n leuen. Wie het tans te veel WMDs? Amerika, in my opinie.
Ek kan ad infinitum oor internasionale kwaadstokery deur Amerika redeneer. Daar is Kongo, Vietnam, Kambodja, Chad. Korea, waar kommunistiese denkwyses so gevaarlik is, dat dit moord en doodslag regverdig. Maar ek moet ophou want ek wil by ander punte uitkom.
En die punt is, as dit gaan oor internasionale vrede vir almal, is Amerika nie die “good guys” nie. Alle Amerikaanse strategiese internasionale beweging word uitgevoer om Amerikaanse belange te bevorder. Die vrede wat hul wel bewerkstellig, is “doodtoevallig” omdat dit in hul volgehoue besigheidsbelange is om vrede daar te handhaaf. Mag jy so gelukkig wees om in so ‘n land te leef. Amerika het keer op keer bewys dat sy bomme op jou en jou kinders sal laat reën, of agter die skerms ‘n klein coup of burgeroorlog sal ontketen, as dit kommersieel voordelig vir haar sal wees. Woe be upon him who stands in America’s way.
Dit is so duidelik soos daglig, dat, alhoewel haar PR die teenoorgestelde sê, Amerika die vyand is van wêreldvrede. Die vraag is, wat in hemelsnaam, nee askuus, wat de hél soek sy op die VN se veiligheidsraad? Dis ‘n liggaam wat kwansuis verantwoordelik is vir internasionale vrede en sekuriteit. Nie net is Amerika ‘n permanente lid nie, sy het vetoreg. ‘n Reg wat sy onlangs aangewend het om te stem teen ‘n skietstilstand in Gaza. Nie dat Israel sou geluister het nie. Hulle is te druk besig met die “final solution.” Maar steeds: Dit was Amerika wat gestem het teen ‘n skietstilstand.
Dis tyd dat ons as ‘n wêreldbevolking die VN en die Veiligheidsraad herbesoek. Die Veiligheidsraad doen presíés die teenoorgestelde as dit waarvoor hulle in die lewe geroep is. Dit rek oorloë tot in alle ewigheid uit. Nêrens kan die Veiligheidsraad ingryp om vrede te bewerkstellig nie, want as Amerika nie ingryping veto nie, sal Rusland, of Sjina.
A ons terugstaan en vir ‘n oomblik die karakter van die permanente lede op die Veiligheidsraad ondersoek, kom mens tot die skokkende besef, dis die oorlogmakers in beheer van die wêreldvrede.
Amerika weet ons is smoorverlief op oorlog; sal alle wêreldbronne opgebruik in ‘n japtrap vir ‘n dollar; hoofbydraer tot klimaatsverandering wat lewe vir miljarde mense op aarde moeiliker tot onmoontlik maak. Verdien sy om op die Veiligheidsraad te sit en ander lande se wil om vrede te veto? Nee, sy verdien nie haar posisie nie. Maar daar sit sy nou, die hoofboelie wat niemand kan verwyder nie.
Dan is daar Brittanje. Verdien Brittanje om daar te wees? Na kolonialisme, diefstal, volksmoord, konsentrasiekampe? Voor hulle weer woord oor wêreldpolitiek rep, wil ek eers hoor watter planne hul gaan maak om aan terug te betaal waar hulle gesteel het. Ek luister by die raadloos.
Wat van Rusland? Rusland is letterlik op hierdie oomblik besig met een van die talle oorloë wat hulle begin het. Watter reg verdien Rusland om namens die wêreld te besluit waar vrede gemaak mag word en waar nie? Geen!
Sjina is ook nie sonder sonde nie. Tot op hede is hulle betrokke by die onderdrukking van vryheid en selfbeskikking. Dink maar net vlugtig aan Tibet, die Uyghurs en die eienaardige situasie met Taiwan op die oomblik wat die “one China” illusie moet in stand hou. Amerika se aksies jeens Taiwan, word deur Naom Chomsky beskryf as “provocative” and “increasing the levels of confrontation” met Sjina. Mag daar nooit ‘n oorlog in die gebied uitbreek nie, maar as dit gebeur sal Amerika weereens ‘n groot deel van die oorsaak daarvan wees.
Noem my idealisties en naïef, maar in ‘n regverdige wêreld is hierdie booswigte nie in beheer van die liggaam wat vrede en sekuriteit moet bring nie. Hulle is dan die aggressors. Watter lesse leer ons vir ons kinders as ons die boelies baas maak van almal juis omdat hulle die gevaarlikstes is van almal? Dis ‘n tirannie deur die sterkstes. Die boelies in beheer. Dis argaïes. Die mensdom moet verder evoleer en hierdie waansinnigheid afskud. Hoeveel “American Heroes” word in verre lande stukkend geskiet en dan in houtbokse, trots gedrapeer met die Amerikaanse vlag aan hul moeders oorhandig? Is die post-mortem Purple Hearts en die 21 gun salute by die grafte van Amerikaanse soldate genoeg om vertroosting te bring aan hul geliefdes? In die naam van vrede? ‘n Vrede wat soveel verwoesting insluit?
Vir wêreldvrede om ‘n kans te staan is dit duidelik dat óf die Veiligheidsraad moet ontbind word, óf die vetoreg moet afgeskaf word en daar moet ‘n reël aangebring word wat sê dat geen land wat in die laaste 10 jaar in ‘n oorlog betrokke was, mag op die Veiligheidsraad dien nie. Miskien is daar ander beter voorstelle wat sal kan werk, maar ons almal kan teen die tyd sien die Veiligheidsraad soos dit tans werk is net ‘n impotente las vir wêreldpolitiek.
Mense mag dalk dink dat ek anti-Amerika is omdat ek haar kritiseer, maar dis glad nie die geval nie. Inteendeel, ek het haar lief op maniere wat ek self nie verstaan nie. Ek wens vir haar verlossing van hierdie gyselaarskap waarin haar wurgende wapenindustrie haar het, dat sy nie eers haar eie mense op eie bodem kan beskerm nie. ‘n Magtige industrie wat heelwat meer geld maak uit oorlog as uit vrede.
Vandag staan Amerika nie net in die pad van vrede in die Midde-Ooste nie, sy is letterlik die een wat die bomme verskaf waarmee volksmoord gepleeg word. Daar is geen oplossing in Palestina moontlik solank Amerika betrokke is nie. Die nadraai van die vernietiging van Palestina gaan lei tot voortdurende tereuraanvalle op Joodse teikens wêreldwyd. Iets wat Jode glad nie verdien nie. Ek kan nie sien hoe Israel se dade nie nuwe antisemitisme kweek nie. Dis hoekom daar so ‘n groot beweging wêreldwyd deur Jode is om hulle te distansieer van Israel se geweld en volksmoord.
Hier kom gevaarlike tye vir die ganse wêreld en baie daarvan is Amerika se skuld. Biden gee die game weg met sy woorde: “Were there not an Israel, the United States of America would have to invent an Israel to protect her interest in the region.”
Joe Biden's long history of pro-Israel statements:
Vir Amerika gaan dit nooit om vrede en selfbeskikking nie. Vir Amerika gaan dit altyd oor “protecting her interest.” Dis waar die probleem vir die res van die wêreld lê en veral dáárom verdien Amerika nie die mag in die VN wat sy tans geniet nie. Biden sê ook: “there is no space between the United States and Israel”. Hoe anders moet ons dit interpreteer dat, as dit in Israel se belange is om Gaza te vernietig, al haar kinders inkluis, dit dus ook in Amerika se belange is om Gaza te vernietig. Kinders inkluis. Amerika weereens die volksmoordenaar d.m.v. Israel.
Ek is net diep ongelukkig en ontsteld dat Amerika haarself in ‘n perfekte posisie bevind in wêreldpolitiek om vrede te bewerkstellig, maar dit nie doen nie, want geld. Selfs die Bybel vertel vir ons dat, as jy jou talente nie aanwend nie, jy hulle gaan verloor. Dis tyd dat oorlog-Amerika haar triggerfinger ‘n blaaskans gee, haarself bietjie verskoon, of ten minste stilbly, wanneer die res van die wêreld probeer om vrede te maak.
Is daar vandag ‘n almagtige Vader wat die mensdom op die regte pad hou? Of is ons maar aan onsself oorgelaat om ons lewenspaadjies te kies? En as God deesdae met ons sou praat, hoe ontvang mens daai woorde? Wie hoor waarlik die ware woord van God direk van God af? Oom Angus? Rooies? Winckler? Wiid? Hoor jy dit self? En is dit werklik God wat praat?
Elke keer as ek iets hoor van wat God gesê het, is dit maar gewoonlik uit ‘n ander mens se mond uit, of ‘n boek wat ‘n ander mens geskryf het. ‘n Uitverkore mens wat vir ander mense sê God praat met hom of haar. ‘n Mens wat woorde in God se mond plaas.
Wat is meer realisties om te glo, dat die een ware God lang gesprekke met oom Angus voer? Kan dit werklik waar wees? As God werklik met oom Angus praat, hoekom skryf hy nie nog Bybel nie? Die Derde Testament? Moenie God se Woord so ongehoords en ongesiens verby laat gaan nie.
Wanneer iemand vir my sê dat God se woorde uit sy mond kom, gaan ek hom nie goedsmoeds glo nie. Is daai woorde werklik God se woorde? Of het jy dit uit jou duim uit gesuig om heiliger as hier te klink? Sorrie. Om dit aan te wend vir haar sedepreke sou sy kon raai, maar Wiid weet nie werklik wat is die ware woord van God nie.
So waar hoor mens vandag die w are woord direk van God af? Die voor die handliggende antwoord op my probleem is die Bybel. Die ware woord van God ís mos die Bybel, of hoe redeneer ek dan nou? As ek dus wil weet wat God sê, moet ek die Bybel lees. Want dis mos die woord van God, of hoe?
Wel, hier spartel ons nou weer met die gewaarwording dat die Bybel, hoog aangeskrewe soos dit is vir ewige sielsaligheid en ‘n padkaart tot moraliteit, is weereens nie die ware woord van God nie, maar die vermeende “ware” woord van God, soos neergepen deur ‘n klomp Joodse ou omies.
Niemand het ‘n ooit ‘n ooggetuie geken wat gesien het hoe God self die Bybel skryf nie. So hoekom kry die Bybel dit reg om met die onbewysbare dog betwisbare statussimbool om te gaan as die Woord van God? Die duidelik ‘n mensgemaakte boek, vanwaar die verhewe status? Van die Bybel self? Of uit die feit dat miljarde dit glo?
As jy vir Google vra: how many christians in the world dan sê sy blitsvinnig met outoriteit “2.38 billion”. Hoe weet google dit? Raadpleeg sy dalk direk vir God?
Ek vermoed Google tel onder daai 2.38 miljard heelwat mense wat wel uit histories Christen gemeenskappe kom, maar nie self Christene is nie. In my mening is die ware syfer Christene nog laer, maar ek kan dit nie bewys nie, so kom ons gaan dan maar met die woord van Google.
Vra vir Google hoeveel mense daar is in die wêreld hoeveel mense in die wêreld en net so vinnig vertel sy jou daar is 8.1 miljard. Trek dan af daai 2.38 miljard en ons sit met 5.72 miljard wat nie glo die Bybel is die woord van God nie.
Dit beteken dat, as jy wil hê die Bybel moet die woord van God wees omdat baie mense so sê, is die Wiskunde nie aan jou kant nie. ‘n Ding word nie meer waar omdat meer mense dit glo nie. Dit word waar, of verkeerd, bewys wanneer dit getoets word. 2.38 miljard opinies bly steeds maar opinies.
Die Bybel self kan nie bewys dat dit die woord van God is nie, net soos ‘n lemoen nie kan bewys dat sy eintlik ‘n appel is net omdat sy so sê nie. Al wat die Bybel kan bewys is dat daar eens op ‘n tyd ‘n klomp mense was, wat woorde oor God en die wêreld geskryf het.
Baie van daai woorde oor die wêreld is verkeerd bewysbaar, soos dat die wêreld in 6 dae geskep was en dat daar ‘n vloed was wat die hele wêreld onder water gehad het met net een boot met twee van al die diere op aarde daarin. As die Bybel dus nie altyd die waarheid praat oor die wêreld nie, hoekom moet ons glo dat die Bybel altyd die waarheid praat oor God?
Almal het ‘n reg tot sy eie geloof. Dit beteken ook dat niemand die geloof van ‘n ander as die waarheid hoef te aanvaar nie. En waarheid in religie is nie werklik soos waarheid in die regte lewe nie. Daar is altyd so bietjie hoop en opinie in religieuse waarheid wat nie in werklike waarheid plek kan vind nie. Daai tipe waarheid wat jou God die ware ware God maak en nie die ander ware God van iemand anders nie.
Ons almal weet diep in ons harte, al gaan ons almal dit nie erken nie, oom Angus maak woorde wat hy hoor van God self op. Net soos die Joodse ou omies wat die Bybel geskryf ook daarin God se woorde opgemaak het.
Natuurlik is baie van die Bybelskrywers gelei deur ‘n lang geskiedenis van oorvertelde verhale wat hulle eintlik op die ou end maar net neerskryf. Maak dit egter die saak vir die waarheid van die Bybel sterker dat dit spruit uit jare en jare se oorvertellings?
Almal weet oorvertellings lei tot alternatiewe verhale wat weer lei tot teenstrydighede. Byvoorbeeld daar is twee verskillende skeppingsverhale in Genesis. In Genesis 1 skep God die aarde in 6 dae en duidelik eers die plante voor Hy mens skep. In Genesis 2 skep God eers vir Adam en daarna skep Hy die tuin van Eden om hom daarin te plaas. Daar is ook geen sprake van ‘n 6 dag-skeppingsposes nie.
Daar is duidelik meer as een skrywer wat gewerk het aan Genesis en hulle was nie eens hoe dinge verloop het in die begin nie. Dinge raak egter nie beter na mate meer en meer boeke van die Bybel verskyn nie.
In Genesis 32:30: “en Jakob het die plek Pniël genoem, ‘want,’ het hy gesê, “ek het God van aangesig tot aangesig gesien en tog het ek nie omgekom nie.” Maar die Bybel sê Jakob lieg, want Johannes 1:18 is dit duidelik: “Niemand het God ooit gesien nie.”
Daar is net te veel teenstrydighede in die Bybel wat selfs sommige teoloë sal erken dat ons liewer die gees van God moet ervaar as wat ons elke woord letterlik moet interpreteer. Johannes 1:18 doen ook nie veel om die geloofwaardigheid van oom Angus se gesprekke met God te ondersteun nie, maar mens kry die gevoel dat oom Angus goed bedoel. Moet ons hom nie maar toelaat om sy verbeeldingsvlugte aan te wend om die mensdom na die regte pad te lei nie?
Kom ons kyk bietjie na paar wat oom Angus sê ek weeg dit om te sien of dit universeel aangewend kan word om ons almal te lei. Oom Angus sê: “we need a Christian government”. Is dit werklik gewens? Demokrasie so vol foute as wat dit is, is steeds beter as outokrasie, selfs religieuse outokrasie. Of so vermoed ek voel meeste mense, ek het beskik nie oor die syfers om te kan sê presies hoeveel mense sou ‘n religieuse regering verkies nie. Ek weet wel daar is reeds ‘n Christelike party en hulle doen maar bra power.
Dan sê Buchan homoseksualiteit kan genees word. Dis nogal ‘n venynige belediging om mense wat lief is vir iemand van hul eie geslag te doop as “siek”, is dit nie? ‘n Buchan regering in sal duidelik nie goed wees vir almal nie, maar dis ‘n demokrasie so as hy so regering wil sien, is dit sy volste reg om homself verkiesbaar te maak. Ek sal nie vir hom stem nie.
Miskien doen ons dit heeltemal verkeerd om. Miskien moet ons liewer kyk na regerings waar God die politiek regeer (in die mate wat dit werklik moontlik is deur middel van mense, want soos ek argumenteer, geskied selfs God’s regering op aarde deur maar deur middelmanne. (En ek mag se “manne” want ek is nie bewus van enige van God se regerings op aarde wat deur vroue geadministreer word nie.))
Sharia regerings sluit in Saudi Arabië, Pakistan, Afghanistan, Iran, Irak, Jemen, Soedan. Wie enige van hierdie lande se regerings wil verdedig as beter as sekularistiese regerings is welkom. Ek kan nie, en ek gaan nie.
Vandag is daar net een Christelike teokrasie in die wêreld en dis die Vatikaanstad met ‘n populasie van minder as ‘n duisend mense. Sal elke land in die wêreld nie droom om so welvarend te wees soos die Vatikaan nie. Mense kan maar self debatteer of God heers oor Vatikaanstad en of dit die pous is, maar dis duidelik, met die rykdom wat die Rooms-katolieke kerk oor die eeue versamel het, daar word nie juis gesukkel nie. Dis egter soveel van ‘n uitskieter verskynsel dat dit nie vergelyk kan word met enige ander regering nie.
Dan is daar Israel. ‘n Joodse staat. Is dit ‘n demokrasie? Ja hulle stem, maar wie stem? Amerika en Israel gee voor Israel is ‘n demokrasie en hulle verkoop gereeld Israel as die enigste demokrasie in die gebied. Maar soos Joshua Leifer dit stel: mense “misrecognize Israel as democracy when it is, in fact, a liberal ethnocracy that has maintained a military dictatorship in the West Bank for more than half a century.” (bron: The Gaurdian: israel-hasnt-been-a-democracy-for-a-long-time-now-israelis-need-to-face-this-fact
Leifer se woorde kom uit ‘n vroeër era, etlike maande voor Oktober 7 toe hy waarsku: “the absence of real democracy continues to undermine the country’s political stability”. Eenvoudiger dae.
So watter rol speel God in Israel se etnokasie? Regeer God vir Israel? Weereens hou ek vol, dis mense wat Israel regeer en jou sal vertel hulle doen dit in die naam van God.
Dit wat tans gebeur in Gaza is wel baie Bybels. In Amos 1:7 en 8: “Daarom sal Ek binne die mure van Gasa 'n vuur laat losbreek
en dit sal sy mooi huise verteer… en die Filistyne wat nog oor is, sal omkom, sê die Here my God”
En in Deuteronomium 7:1 en 2: ”Die Here jou God sal jou bring in die land waarheen jy op pad is en wat jy in besit sal neem. Hy sal baie nasies voor jou uit verdryf… in jou mag oorgee en jy hulle verslaan, moet jy hulle om die lewe bring as banoffer aan die Here jou God. Jy mag hulle nie jammer kry en 'n verbond met hulle sluit nie”
In Joshua 6:21 is die Godgesanksioneerde etniese suiwering totaal: “en al wat daarin is, uitgedelg, man en vrou, jonk en oud”. In 1 Sameul vertel Sameul vir Saul “die woorde van God”: in 1 Sameul 15:3 “Jy moet alles wat hy het, om die lewe bring. Jy mag jou oor hom nie ontferm nie. Jy moet man en vrou doodmaak, kind en suigling, bees en skaap, kameel en donkie”. En dit is presies wat vandag besig is om in Gaza te gebeur.
Israel is besig om die woorde van God uit te voer soos dit in die Bybel opgeskryf staan in die Ou Testament. En dit is die rede hoekom daar soveel gelowige mense absoluut ekstaties is oor die mensslagting in Gaza vandag. As dit ‘n moeilike gedagte is om te glo, ek het die bewyse swart op wit van ‘n persoon wie se naam ek nie gaan nie noem nie, want soortgelyk soos Jesus gesê het, vra ek, vergeef hom want hy weet nie wat hy doen as hy sê: “Ek kan nie wag tot Gaza finaal uitgewis is nie.”
Ek weet dis ‘n ongemaklike vraag wat nie veel mense wil vra nie, maar die tyd het gekom dat ons dit net eenvoudig moet vra. Is dit ‘n alomteenwoordige almagtige God wat spesifiek sekere mense van sy eie skepping wil uitmoor? Of dit die spesifieke mense wat die spesifieke boeke oor God geskryf het wat wil hê dat ons moet dink dit is wat God wil hê?
As dit kom by Israel se massamoord moet ons onthou: Die Bybel is geskryf deur mense met persoonlike belange op die spel.
Omdat dit wat vandag in Gaza gebeur so ongelooflik verskriklik is en omdat dit letterlik woord vir woord presies so in die Bybel beskryf word, vermag dit basies een ding. Dit onbloot die Bybel se immoraliteit. Dit ondermyn die Bybel se gesag as ‘n universele boek wat op almal van toepassing is.
Die Bybel, of liewer dan, die Ou Testament is nie vir almal nie. Dis ‘n stel boeke geskryf deur Jode met ‘n God wat net belang stel in die geskiedenis en voortbestaan van Jode.
Die God van die Ou Testament is definitief nie ‘n universele God nie. Dit is ‘n hoogspartydige God wat geen belange het by die res van sy skepping nie. Dis net Jode wat saak maak.
Dit maak vir my minder sin om na so god te verwys as God. Die meer akkurate beskrywing van YHWH is die vergestalting van die kollektiewe ego van ‘n heel spesifieke groep waaruit hulle gesag kan fabriseer wat hul kollektiewe belange bo die van alle ander stel dat hul ander kan vernietig en uitwis sonder dat hul kan veroordeel word daarvoor.
YHWH is Jode se gesag waarmee hul ander mag minag en vermoor. Dis nie God nie, dis ‘n volk se get out of jail ticket, of om ‘n nuwe Afrikaanse woordskepping te gebruik: YHWH is die Jode se immoraliteit-immuniteit en Israel buit dit uit.
Jesus, ten spyte van sy Joodse herkoms, bring die verandering wat nodig was vir die Ou Testament om relevant te wees nie net vir Jode nie, maar vir almal. Die wegbeweeg van ‘n oog vir ‘n oog na draai die ander wang. Weg van ‘n god van volksmoord, slagting en beloofde lande oorhandig waarin daar reeds ander mense woon, na ‘n god van liefde en kom ons almal leef saam, deel kos en leer selfs van die Samaritaan.
Om sin te maak van hierdie transformasie is dit nodig om die geskiedenis in ag te neem van wat gebeur het in daardie wêreld in daardie tyd. Die Romeinse Ryk aan bewind waarin daar talle gode toegelaat was, maar alles en almal moes noodwendig onderhewig wees aan die gesag van die keiser.
Vir die klein Joodse volk met hul god YHWH wat ‘n jaloerse god was, is hierdie onderhewig wees aan die keiser se gesag onaanvaarbaar vir hul god. Daarom die Joodse opstand. ‘n Jong man wat voor die Romeinse owerhede staan met die titel koning van die Jode, het nie ‘n kat se kans anders as om gekruisig te word nie. Jy wil jouself kom koning noem van die groep wat nie die Romeinse gesag as die hoogste gesag wil respekteer nie?
Op ‘n pad na Damaskus in die Romeinse Ryk reis ‘n religieuse fanatiese Jood Saulus om die beweging vanuit Joodse geledere wat die leringe van Jesus begin verkondig te veroordeel en uit te wis. Saulus was selfs by en betrokke met die steniging van Stefanus.
Hierdie Saulus hoor die stem van God en verander dadelik sy van die Hebreeuse vorm Saulus na die Romeinse vorm Paulus en blaai ‘n nuwe blaadjie om: in stede dat hy vroeë Christene vervolg, word hy die hoof-Christen en verkondig die woord met groot sukses tot vandag toe nog.
Paulus, nes oom Buchan, vertel dat God met hom praat en wat God vir hom sê is om ‘n nuwe storie te vertel van die nuwe vergestalting van God, minder oorlogsbehep, met minder klem op al die ou Joodse wette letterlik na te kom en ‘n nuwe konsep kom na vore, naasteliefde: ‘Jy moet jou naaste liefhê soos jouself.’ Mat 22:39.
Seker die belangrikste aspek van hierdie nuwe vergestalting van God is dat die naaste van die Nuwe Testament meer is as net die Jode van die Oue. Vir hierdie nuwe God is dit moontlik om god te wees vir almal. ‘n Belangrike eienskap, en nodig vir vrede, in ‘n pluralistiese Romeinse Ryk.
Hierdie god sê ook gee die keiser wat hom toekom. Baie beter vir die Romeinse Ryk as ‘n god wat hoër wil wees as die keiser self.
Bybelgeskiedkundiges beweer van die evangelie dat alhoewel dit die name van Jesus se dissipels dra, dit nie deur hulle geskryf is nie. Jesus se dissipels was nie juis geleerde mense nie, en het Aramees gepraat, terwyl die evangelie deur geleerde skrywers in Grieks geskryf is.
Ons praat dus hier van ‘n tradisie van oorvertelling en wie ook al die boeke op die ou en neergeskryf het het dit minstens ‘n Bybelse leeftyd (40 jaar of meer) na Jesus se dood gedoen.
Markus is die eerste evangelie wat verskyn het so teen die jaar 70AD, Johannes die laaste so tussen 90 en 100AD. Hierdie Bybelskrywers skryf in ‘n tydperk van Romeinse oorheersing direk na die val van die Joodse tempel waar nuwe keiser Vespasian en sy seun Titus sopas ‘n oorweldigende en verpletterende oorwinnings oor die Jode behaal het.
Dis in hierdie tyd en plek waar, uit die ou Joodse geloof, ‘n nuwe narratief vorm wat duidelik heelwat meer pro-Rome is. Toeval?
Wie het hierdie Bybelskrywers in hierdie tyd onderhou? En as Paulus sy brief aan Filippense afsluit sê hy: “Ook al die gelowiges en veral dié wat aan die huis van die keiser verbonde is, stuur vir julle groete.” Filippense 4:22.
In die Romeinse Ryk is Jode gekruisig het wat teen die gesag van die keiser opstaan. Die Jode was juis hierdie opstandelinge, en daar is heelwat gerkuisig. Sodra die Romeine weet jy met die titel “koning van die Jode” rondloop, is jy duidelik ‘n vyand van die staat en is kruisiging jou voorland.
In die Bybel is dit egter duidelik dat Pontius Pilates sy bes probeer het om Jesus vry te laat (Johannes 19:12 - 15) maar dit was die Jode wat aangedring het dat Jesus gekruisig moet word. Dit was die Jode wat gesê het: “Ons het nie ‘n koning nie, ons het net die keiser.” Watter Jood verraai sy god so maklik om die keiser as oppergesag te aanvaar? Geen ware Jood nie, slegs die tipe denkbeeldige Jood wat deur Romeine uitgedink is.
Dis Romeine wat die weë na Damaskus in daardie tyd gepatrolleer het. Dis ook Romeine wat hul keisers in daardie tyd gedeïfieer het. So as die keiser met jou praat is dit so goed soos jy luister na die woorde van God. En as God vir jou sê laat vaar jou eng Joodse gewoontes en spits jouself toe op iets waarin ons almal kan glo, dan doen jy dit. En jy word ryk en jy tree af in ‘n lekker woonstel diep in die Romeinse Ryk en ons sê vir almal dis ‘n gevangeniskap terwyl ons weet dis eintlik ‘n “false witness protection program” om jou te beskerm teen al die Jode wat jou wil vermoor vir al die “fake nuus” wat jy versprei het. Lekker dra die keiser se knegte vir jou druiwe aan terwyl jou woorde stelselmatig die Joodse YHWH se mag op aarde erodeer. Daar tree die Romeinse Ryk selfs op godsgebied as wenner uit die stryd. Die woord van God is waarlik die gevaarlikste wapen op aarde.
In die Nuwe Testament sit ons met dieselfde ou probleem van voor af. Hierdie boeke is deur mense geskryf. Hierdie mense het politieke agendas gehad, asook mag en geleerdheid om op te kom met narratiewe wat hul eie immoraliteit herverwoord as God se wil.
Ek maak geen kleim dat God bestaan of nie bestaan nie. Al wat ek wel sê vir my is dit duidelik dat die Bybel ‘n boek is waamee die mensdom vorendag gekom het en is definitief nie direk die woorde van God nie. My woorde mag dalk nooit so poëties en wonderbaarlik wees soos enige iets uit die Bybel nie, en ek mag dalk gekruisig word daarvoor, maar dit beskik oor ‘n waarheid van outeurskap waaroor die Bybel nie beskik nie: Hierdie is verifieerbaar my woorde, my opinie. Sela
Imagine vir 'n oomblik Gaza is die Here se toets aan ons. Imagine die Here dink oukei goed, dis nou lank genoeg, Ek gaan iets aan plaasmoord doen. Maar voor Ek dit doen, kom ons toets die mense se empatie met ander om te sien hoe baie hulle dit verdien dat Ek hul lewens beter moet kom maak. Dan laat Hy Israel Palestynse kinders vermoor om te kyk of die mense wat elke dag vir Hom pleit ook empatie het met ander wat vermoor word. Dan kom die Here en sien hierdie selfde mense verlustig hulle in Israel se dade/moorde/kindermoordselfverdediging op Beeld se kommentaarblad. Op Beeld se blad is mense pro-moordenaars (Oscar/Israel) en kryt Palestynse kinders as terroriste uit wat dit verdien. Dan kyk Hy weer na die situasie met die oog, hierdie mense wat nie dink Palestynse kinders is onskuldig nie, wil hê Ek moet mense wat na apartheid met al die goeie landbou land sit (toegegee, almal moontlik heeltemal onskuldig aan enige iets apartheid) kom red? Hoe dink jy sal die Heer dan maak?
'n Oplossing vir Palestina en Israel
Breek dit af
Breek die mure om jou af - uit “Tronk” deur Johannes Kerkorrel
Ek lees gister ‘n quote wat ek tien teen een nou verkeerd gaan herhaal maar dis iets soos “Heroes die young, the rest of us grow old to become the villain”. Ek dag, wow cool dis diep, toe sien ek dit kom van the Dark Knight af en somehow was ek nie surprised nie.
Ons het ons stories nodig om vandag se realiteite vir ons klein te kry. Realiteit is net eenvoudig te groot, te veel, te bloeddorstig, te harteloos om te verstaan. So ons skep ‘n verhaal waarin ons nader daarheen kan beweeg sonder om seer te kry, want dit is en bly net ‘n verhaal.
Maar die wonderlike wêreld van verhale maak ‘n nuwe Pandorasdoos oop. Verhale is fiksie, maar omdat daar so baie mense is om verhale op te slurp, is dit ook moontlik vir ‘n verhaal om so populêr te raak dat mense dit met die waarheid begin verwar. ‘n Verhaal wen legitimiteit met die aantal kere wat dit oorvertel of gepubliseer word.
Op hierdie manier is die geskiedenis van Moses in die Bybel “waarheid”, want daar is doodeenvoudig te veel mense wat dit glo, desnieteenstaande talle teenstrydighede in die verhaal wat dit onmoontlik maak om as ware geskiedenis te interpreteer.
Daarteenoor bly Batman fiktief en word Batman-fiksie ‘n Trojaanse perd wat heelwat waarhede insmokkel. Soos dat gister se helde in booswigte ontaard as hulle dit regkry om lank genoeg aan die lewe te bly. Dit bring my by Israel wat ‘n transformasie van aard ondergaan het en te leer uit die geskiedenis om as’t vandag meer te lyk soos die Nazis wat die Jode voorheen onderdruk het.
Wat my bring by Roger Waters se Perfect Sense waar hy sing:
“And the Germans kill the Jews
And the Jews kill the Arabs
And the Arabs kill the hostages”
Dit maak eenvoudig sin veral as jy kyk na wat 7 Oktober gebeur het. ‘n Afskuwelike aanval op Israel deur Hamas waar vrouens, kinders en mans voor die voet afgemaai is. Hierdie afgryslike geweldpleging, kan as niks minder as ‘n massa terroristiese aksie veroordeel word nie. Na raming is meer as 250 Joodse en internasionale gyselaars met geweld geneem. ‘n Bloedstollende gedagte, met Roger Waters se woorde wat maal in die agterkop.
Maar as die mensdom uit die geskiedenis leer, waar het Hamas geleer om so horribaal verskriklik te wees? In 1947-1948 is dit presies wat ‘n groep Zionistiese Jode aan die Palestyne gedoen het.
In ‘n memorandum, “Jewish Atrocities in the Holy Land” voorgelê aan die VN in 1948 word duidelik uiteengelê hoe Jode “indiscriminately massacred civilians, old men, women and children of all ages. Jews bayoneted pregnant women. Jews cut children to pieces before their mothers’ eyes, then killed the mothers…. Jews shot and killed nurses. Jews in Haifa killed, mutilated and crucified Arab prisoners and wounded.”
Bloeddorstige aksies uitgevoer deur Jood op Palestyn word 70 jaar later op soortgelyke wyse deur Palestyn op Jood uitgevoer. Om die sirkel te voltooi antwoord Israel op ‘n wyse soortgelyk as wat die Nazis uitgevoer het op Jode.
Gaza word omhein deur Israel. Geen Palestyn mag die grens oorsteek nie, selfs nie eers na Egipte toe nie. Israel sny die water-, voedsel en elektrisiteittoevoer af en begin bombardeer. Eers in die Noorde. Versprei die nuus dat burgers moet vlug na die Suide en begin dan om die Suide te bombardeer.
Gaza is vandag ‘n konsentrasiekamp waarin mense van ‘n spesifieke etnisiteit soos diere in ‘n veldbrand vasgekeer sit. Met die bomme wat Israel laat reën in die gebied, word hierdie konsentrasiekamp ‘n opelug gaskamer, met paniekbevange, geteisterde Palestyne wat nie eers meer weet watter kant toe om te beweeg om te gaan sterf nie.
So hou die mensdom tog aan om te leer uit die geskiedenis. Moordlustige lesse van geweld om weer en weer toe te pas op díé wat as ondergeskik en minder mens gesien word. Wat my terug bring huis toe.
Suid-Afrika was, soos ons almal weet, gedurende apartheid in ‘n posisie waar polities gemotiveerde geweld heeltyd uitgebreek het. Alles verstaanbaar gegewe die onregverdige ondrukking van rassegroepe. Maar kyk waar sit ons nou? Vandag sit Suid-Afrika in ‘n toestand van relatiewe vreedsame bestaan veral vergeleke met die krisis in die Midde-Ooste.
Daar is sekerlik mense wat dit sal bevraagteken met stellings dat daar ‘n oorlog teen wit mense tans in SA gevoer word. Ek is seker ons het al almal die vraag: “maar wat dan van plaasmoord?” raakgeloop iewers aanlyn waar ons onsself al meer bevind. Net om die perspektief aan die situasie te verleën is dit nodig om te noem dat daar in Palestina in minder as twee maande meer onskuldige Palestynse kinders wreed gesterf het as die getal wit boere wat die afgelope 10 jaar in SA vermoor is.
Dit gesê, bly dit altyd nodig om te noem dat plaasmoord ‘n ontsettende hartseer tragedie is wat ten sterkste veroordeel moet word soos alle moord, ongeag die kleur van die slagoffer. Die moordsyfer in Suid-Afrika is onrusbarend, maar die situasie is geensins ‘n oorlogstoestand vergelykbaar met talle oorloë in lande soos Oekraïne en Israel/Palestina, Burkina Faso, Afghanistan, Sudan, Yemen en ander nie.
Suid-Afrika is ook heelwat meer vreedsaam vergelykbaar met ‘n Suid-Afrika wat kon gewees het as ons nie die pad van versoening geloop het nie. Stel jouself vir ‘n oomblik voor, ons wit kinders en broeder opgeroep na ‘n weermag in aanslag teen ons swart en bruin broeders. Kinders in ons eie land voor die voet afgemaai om ‘n wit minderheidsregering vandag nog in mag te hou. Hoe lank sou daai lys gestorwe soldate, seuns van treurende moeders nie gewees het nie? Die SAUK nuus van ouds sou weereens gemaak het asof bruin en swart kinders wat uitmekaar geskiet is, se stukkende liggame en hul moeders se pyn niks beteken nie.
As Israelis en Palestyne maar net liewer van Suid-Afrika se geskiedenis kon leer in plaas van die Nazis en die Zionistiese Joodse terroriste onderskeidelik, dan sou apartheid tussen Jode en Palestyne opgehef kon word. Nasiebou sou kon geskied in die gebied. Natuurlik nie sonder stampe en stote nie, maar een nasie met verskillende groepe.
Die “tweestaat” droom sal nooit die opheffing van ongelykheid tussen nasies in die gebied teweeg kan bring nie. Nie terwyl een groep al die hulpbronne tot hul voordeel bestuur en al die reëls maak nie.
Die enigste pad na ‘n toekomstige vrede in die gebied is ‘n enkel staat waar verskillende groepe mense ten minste as gelykes voor die wet beskou word. Jood, Palestyn, Christen en alle ander groepe woonagtig in die gebied, moet kan deelneem in dieselfde verkiesings. Verdedig word deur dieselfde militêre mag. Hulpbronne moet aangewend word ten bate van almal in die gemeenskap en nie oop- en toegedraai word as wapen nie.
In kort, Israel en Palestina moet saamsmelt en een nuwe land word. Met ‘n nuwe identiteit. Solank dit nie gebeur nie, sal daar nooit vrede oor daardie stukkie aarde heers nie.