Kampus-Beeld   7/30/2003

Soms verloor ek die plot . . . maar veelsydige Riku Latti weet hoe om die pen in te lê
Kampus-Beeld   7/30/2003
Cathrin Myburgh


'n Gemini maak jou een uit elke twaalf, as webwerf-ontwerper is jy deesdae geensins uniek nie en 'n filosoof vind mens om elke kampvuur. Wat dan nou van skrywer en musikant?
Maar sit al hierdie bymekaar en dit kan jou heel moontlik een in duisend maak. En Riku Latti, hou vas, hy kan óók rugby speel -- "maar niemand wil my 'n kans gee nie".

Hy voel mens moet die lows in die lewe ervaar om die highs werklik te waardeer; en hy hou nie rêrig daarvan om met mense soos ek te praat nie.

Dï t kan ek nou verstaan. Wie wil rêrig jou lewe ontbloot voor 'n totaal en al vreemdeling? Hy hoef egter nie te veel te ontbloot nie, mens kan genoeg van die lewe van 'n kunstenaar in sy oë sien. En hy het toe nie te veel gesukkel om oop te maak nie.

Dit was moeilik om eintlik te praat oor die musiek wat hom 'n bekende gesig in Pretoria se musikale line-up maak, want daar is dié webwerf: Zimdollar ( www.zimdollar.co.za ).

'n Bekende gesig vir baie wat rondkrap, en dit is glo 'n besliste wenner. Hier kry Riku 'n kans om baie van sy filosofieë op die SA massa uit te toets. Hy beplan ook om 'n internetboek te publiseer wat sy filosofie aan die wêreld probeer verduidelik. "Ek het dit nog nie heeltemal geformuleer nie," sê hy, maar hy het wel verwys na Eugene Marais se Die siel van 'n mier , waar dit duidelik is dat mens nie bewus kan wees van dit wat groter is as jy nie . . . Verder wil mens nie uitbrei nie, maar dit sal dan immers nog op internet neergelê word.

Terug na musiek, voel Riku hy is seker die . . . selfpromotor in die geskiedenis van musiek, "want ek is glad nog nie op die scene nie". Hy skryf elke liedjie om in 'n nuwe genre te val, maar die meeste binne die pop-genre. " 'n Tune moet vir my catchy wees."

Ek het nou al Riku live en op CD gehoor en in sy musiek-kokon is daar min verkeerd te vind. Hy skryf in sowel Afrikaans as Engels en die meeste liedjies is vir my oor 'n wenner. Genoeg so dat ek met my eerste ontmoeting baie naby aan groupie- materiaal gekom het. My vriendin, 'n gebore cool cat , het ook so 'n bietjie inmekaar geval.

Tans is Soms die liedjie wat die naaste aan Riku is. En hy voel "enigeen" sal sy musiek "geniet" as hulle die kans kry om dit te geniet. Hiermee moet ek sê kan ek saamstem. Sy musiek is divers, en ek het aanklank daarby gevind.